પ્રમાણિક જીવન
6045
post-template-default,single,single-post,postid-6045,single-format-standard,central-core-1.0.1,ajax_updown_fade,page_not_loaded,

Rajwani

પ્રમાણિક જીવન

01 Mar 2005,

અંક ૨૧

માર્ચ૨૦૦૫

માનવ મનમાં જ્યારે તૃષ્ણા ઈચ્છા જાગે છે ત્યારે તે સારાસારનો વિવેક વિસરી જાય છે. આ તૃષ્ણા માનવના તનની, મનની, ધનની, પદ, પ્રતિષ્ઠાની પણ હોઈ શકે છે. તૃષ્ણા, બેઈમાનદારી, અપ્રમાણિકતાની જનેતા છે. અનીતિમય રીતે મેળવેલું ધન, પદ, પ્રતિષ્ઠા, માન એ આસુરી અસાત્વિક સંપત્તિ છે. નકલી ચળકાટ છે. કાંટાળું દુઃખમય પ્રારબ્ધ નિર્માણ કરનારું પરિબળ છે.

આસુરી, અસાત્વિક સંપત્તિ અને નકલી ચળકાટ વ્યક્તિના ચારિત્ર્યને કલંકિત કરે છે. તેના આત્માને ડંખે છે. અંતરમાં અશાંતિ, અજંપો ઉત્પન્ન કરે છે. સદાયને માટે સંતાપની સગડીમાં સળગ્યા કરવું પડે છે. આસુરી સંપત્તિના પ્રત્યાઘાતો વ્યક્તિના વર્તમાન જીવનમાં અને પરિવારમાં વર્તાય છે. રોગો, દુષણો, દુર્વૃત્તિઓ, ખંડિત ચારિત્ર્ય, ખોડખાંપણવાળા બાળકોની પેદાશ જેવા, ખાટા, કડવા, કાંટાળા પરિણામ રૂપી ફળો ભોગવવાં પડે છે. અસાત્વિક, દૂષિત સંસ્કારો વ્યક્તિના જન્મજન્માંતર સુધી તેનો પીછો છોડતાં નથી. નીતિમય પ્રમાણિક જીવન જીવવામાં સુખ છે, શાંતિ છે, નીતિમય જીવનથી વ્યક્તિનું ચારિત્ર્ય ઉજ્જવળ બને છે. સાથે સાથે કુટુંબ, સમાજ, રાજ્ય અને રાષ્ટ્રનું ગૌરવ વધે છે.

સાંપ્રત સમયમાં જ્યારે અપ્રમાણિકતા, બેઈમાની, અનીતિની બોલબાલા છે ત્યારે સામાન્ય વ્યક્તિને ઘડીભર એમ થાય કે, નીતિ નીતિ કરીને ઢસરડો કરવા કરતાં બેઈમાન થવામાં જ મઝા છે. બેઈમાનદારીમાં મહેનત ઓછી અને વળતર ઝાઝું મળે છે. વળી આવા બેઈમાનદારી ભર્યા વાતાવરણમાં ઈમાનદાર વ્યક્તિનું જીવવું મુશ્કેલ બની જાય છે, કામ કરવું કઠિન બની જાય છે.

તો શું આપણે ઈમાનદારીનો, પ્રમાણિકતાનો નીતિમય જીવવાનો છેદ ઉડાડી દેવો? બેઈમાનદારીને પોષવી? અપ્રમાણિકતા ચલાવી લેવી? હરગિઝ નહિ.

પહેલા આપણે સમજીએ કે, ઈમાનદારી એટલે શું? ઈમાનદાર વ્યક્તિની વ્યાખ્યા શું? જે વ્યક્તિને સારાસારનો ખ્યાલ હોય અને પોતાનું જીવન વિવેકપૂર્ણ રીતે જીવે, પોતાનું કામ દિલ દઈને કરે અને સારું કામ કરતા જેને રોમેરોમમાં આનંદ વ્યાપી જાય. ખરાબ, અસાત્વિક કામમાં જેનો સાથ સહકાર ન હોય, તેમજ તેવા કામમાં તેની નારાજગી હોય. આવી વ્યક્તિ જ ઈમાનદાર કહી શકાય.

ઈમાનદારીની વાતો કરવી કે સાંભળવી તે એક વસ્તુ છે. પરંતુ ઈમાનદારીનું આચરણ જીવનમાં અપનાવવું તે નીડર વ્યક્તિની નિશાની છે. નીડરતાથી જ સાત્વિક ચારિત્ર્યનું ઘડતર થાય. શરૂઆત ઘરઆંગણેથી, પોતાનાથી જ કરવી જોઈએ. સમાજને કે જગતને સુધારવાનો ઈરાદો રાખનાર વ્યક્તિએ પોતાનાથી જ શરૂઆત કરવી જોઈએ. “ટીપે ટીપે સરોવર ભરાય”. ઉક્તિ અનુસાર ઈમાનદાર, પ્રમાણિક વ્યક્તિઓનો સમૂહ ભેગો થાય તો અપ્રમાણિકતામાં પરિવર્તન લાવી શકાય. અપ્રમાણિક, બેઈમાનદાર વ્યક્તિઓના સમૂહમાં ઈમાનદાર વ્યક્તિએ પોતાનું ચારિત્ર્ય ઉજ્જવળ રાખવા માટે

સાવધાની રાખવી પડે, વિવેક દાખવવો પડે જેથી બેઈમાનદારીની ગટરમાં ગબડી ન પડે કે ગટરના ગંદવાડના છાંટા પોતાને કલંકિત ન કરી જાય.

પરમાત્માનું સતત સ્મરણ, પ્રાર્થના અને આપણી ધીરજ જ આપણા સાત્વિક સંકલ્પને પુષ્ટ કરવામાં મદદગાર થઇ શકે. સત્સંગ અને સદગુરુનું શરણ આપણું માર્ગદર્શક અને પ્રેરકબળ બની શકે.

એષણાઓનું નિયંત્રણ, પરિવારમાં સાત્વિક સંસ્કારોનું સિંચન અને સત્સંગની સરિતાથી અવિરત વહેતુ વહેણ જ આપણાં જીવનમાં સુખ, શાંતિ, સંતોષ અને આનંદનો સ્વસ્તિક રચી શકે.

મા

– રાજયોગી નરેન્દ્રજી